Djabièrnè ultimo Digicel a tene un evento den su Megastore na Biesheuvel na unda ku a firma un MoU ku Ministerio di Enseñansa, Siensia, Kultura i Deporte pa entrega di 100 unidat MiFi di manera ku nan por repartí pa skolnan na Kòrsou. E ministerio ta risibí e unidatnan MiFi komo un donashon di parti di Digicel. CEO di Digicel, sr. Roeland van der Hoeven a komentá ku nan ta masha orguyoso di por hasi e gesto aki. “Covid a mustra nos ku poko poko nos mester kuminsá yega na un modelo pa e konsepto di un Digital Classroom. Esaki ta hasi ku muchanan ta benefisiá di digitalisashon den e tempu modèrno aki pa risibí lès i hasi nan tareanan eskolar. Esaki no ta un konsepto deskonosí pa Digicel ya ku den diferente merkado nos a bin ta traha huntu ku gobièrnu di pais pa ofresé esaki. Digicel tin amplio eksperensia ku konseptonan di Digital Classroom i ta prepará pa kontribuí na sektor di enseñansa ku e konosementu aki”.
Un proyekto prometedor
E donashon di parti Digicel ta kontribushon na un proyekto piloto ku lo eksplorá diferente senario di enseñansa na skolnan básiko i VSBO. Den e proyekto aki lo kontemplá e senario na unda e mucha ta risibí lès ‘online’ for di nan kas, i otronan na skol di akuerdo ku nan skema eskolar. Kada unidat MiFi di Digicel lo tin 500 GB di data pa luna durante di e trayekto i lo ta programa pa blòkia sierto wèpsait ku ta impedí e studiante di hasi su lès optimalmente, miéntras ku ta brinda akseso na wèpsaitnan ku ta jùist krusial pa e proseso edukashonal.
Riba fotonan athunto momentu ku CEO di Digicel, sr. Roeland van der Hoeven a hasi entrega di e unidatnan MiFi na Promé Minister di Kòrsou, sr. Eugene Rhuggenaath aktualmente enkargá ku kartera di Enseñansa, Siensia, Kultura i Deporte.
Bình luận