Kòrsou su Barista Champion ta kla pa kompetí na Costa Rica. Rozalia Franciska, a sobresalí riba tur otro kolega di Starbucks Kòrsou. Su kreatividat, pashon i konosementu di e mundu di kòfi ta tòp. Rozalia ta un Starbucks partner pa dos aña kaba i ta kla pa kompetí na e di 8 kompetensia anual di ‘Starbucks Barista Championship’. Míles di barista ta kompetí den e promé tanda ku ta na nivel nashonal pa despues e barista ganador demostrá su talento na nivel regional representando su pais.
Un kos ta sigur; tur bebida sea ta un cappuccino, latte, èsprèso òf frappuccino, tur ta wòrdu kreá ku pashon. Kada barista di Starbucks ta traha ku dedikashon i ta demostrá nan abilidat p’e arte di kòfi kreando bibidanan ku ta ofresé un eksperensia sin igual na kada kliente. Rozalia ta un barista ku eksperensia na Starbucks Renaissance Mall. Pa Rozalia kòfi ta representá konekshon ku su klientenan, spesialmente esnan ku ta bin via barku krusero. E satisfakshon di mas grandi ta e atenshon personalisá ku kada bishitante ta sali kuné for di Starbucks. Rozalia su bebida mas gustá ta, un White Mocha ku Oat Milk ku Caramel Drizzle riba e whip cream.
E promé Latin America & Caribbean Barista Championship a tuma lugá na 2015. E aña aki LAC Barista Championship 2023 tuma lugá den e siman di 13 pa 16 di Novèmber na Hacienda Alsacia, Costa Rica. Hacienda Alsacia ta un finka di kòfi i tambe t’e edifisio prinsipal pa agronomia global situá un ora leu di San Jose, e kapital di Costa Rica.
“Un barista ta protagonista den éksito di Starbucks i e LAC Barista Championship ta ofresé tur barista un plataforma pa demostrá nan talento i pashon pa kòfi”, esaki segun Wanda Broeksema, District Manager pa Starbucks Kòrsou i Aruba. Broeksema ta añadí; “Mediante e kompetensia ta krea i elevá kalidat di kada bebida konhuntamente ku otro partners, nos baristanan ta reforsá e mishon di Starbucks: Ku kada kòpi kòfi, ku kada kòmbersashon, ku kada komunidat, nos ta krea posibilidatnan sin límite pa konektá ku humanidat. Ademas, e ta un tremendo eksperensia pa nos baristanan lokal pa konosé otro parti di mundu i otro kultura”. Tur kolega di Starbucks Kòrsou ta deseá Rozalia hopi éksito na Costa Rica.