Riba 14 di febrüari, tur skol básiko na Kòrsou a risibí un pakete kompañá pa un karta dediká na e maestra(o) i muchanan di grupo 3. E pakete ta konsistí di un buki titulá “Kurasonchi.” Kurasonchi ta un kurason ku hopi pashon i energia pero riba un dia e ta disidí ku e kier ta algu otro ku djis un simpel kurason. Pa e motibu aki, Kurasonchi ta disidi di bai keiru rònt di e kurpa pa eksperenshá e bida di un wowo, nanishi, boka, orea i te asta man ku pia. Durante su aventura, Kurasonchi ta siña hopi, pero e lès mas grandi ta bin ora e ta haña sá kon importante un kurason chikitu den un mundo grandi ta.
Kurasonchi ta un kreashon di outornan Levi Silvanie (Kòrsou) i Rosabelle Illes (Aruba). Tur página ta akompañá pa un ilustrashon kreá pa ilustradora Jowy Maasdamme (Ulanda). E storia ta publiká na Papiamentu, Ingles, Spañó i Ulandes. Di e forma aki, e outornan ta rekonosé e importansia di e dominio di un lenga materno na promé lugá i atraves di esaki, siña otro idiomanan.
Despues di a lansa e buki na Aruba riba Dia Mundial di Kurason (29 di sèptèmber 2018), e proyekto ta yega Kòrsou riba un otro dia spesial, ku ta dia di San Valentino. Den e karta ku ta akompañá e pakete, Kurasonchi mes ta splika ku riba 14 di febrüari tur hende rònt mundo ta usa nan kurason pa manda amor. Komo ku manda amor ta Kurasonchi su meta, e ke komparti su storia i e aventura ku a siñ’é stima su mes i apresiá ken e ta.
E proyekto ta konta ku sosten di Unoca, Prins Bernhard Cultuurfonds Caribisch Gebied, Caribbean Mercantile Bank N.V., Maduro & Curiel Bank N.V., Aruba Tourism Authority, Faro Blanco Restaurant, New India Assurance Aruba i Curaçao Cares. Pa mas informashon tokante Kurasonchi i pa reservá bo buki bishitá e websáit www.heartythebook.com i sigui tur desaroyo via di e página di Facebook i Instagram di Hearty the Book.