top of page

Renaissance Wind Creek Curaçao Resort a selebrá su 15 aniversario



Djaweps dia promé di Febrüari 2024, e tim di ehekutivo i gerente a bini huntu pa selebrá 15 aniversario di Renaissance Wind Creek Curaçao Resort huntu ku nan partnernan den industria hospitalario. Esaki ta marka un bunita paréntesis den un trayekto eksitoso p’e kompania. Ehekutivonan ta reflekshoná riba inisio di e kompania 15 aña pasá, bisando ku for di su apertura Renaissance Wind Creek Curaçao Resort, e tempu ei Renaissance Curaçao & Resort Casino, tabata mas ku un hotèl. E kompromiso pa ofresé servisio eksepshonal, kreando eksperensianan inolvidabel pa kada huéspet i bishitante a hunga un ròl importante den desaroyo di e industria turístiko di nos pais. Ademas di esaki, Renaissance Wind Creek Curaçao Resort ta konosí komo un bon siudadano korporativo dunando bèk na nos komunidat mediante diferente inisiativa i kampaña.

 

Den transkurso di 15 aña Renaissance Wind Creek Curaçao Resort a yena un papel importante den promoshon di e bunitesa di nos isla, ofresiendo hospitalidat sin presedente na huéspet for di tur parti di mundu. Angelo Martes ta suprayá,“Nos dedikashon na ekselensia a keda rekonosé, i premiá pa diferente organisashon internashonal. Nos ta orguyoso di p.e  premio “Hall of Fame”- di TripAdvisor na 2019, rekonosiendo ku nos a gana e “Travelers Choice Award pa 5 aña konsekutivo. Tambe, number dos di e USA TODAY 10Best Reader's Choice Awards pa e mihó resort den Caribe na 2022. Meskos tambe e Marriott “Hotel Of The Year” den Caribe i Latinoamérika na 2022. Nos ta bolbe afirmá nos kompromiso ku Kòrsou p’e añanan benidero”. Renaissance Wind Creek Curaçao Resort ta un kas na unda un simpel bishita ta bira un eksperensia memorabel.

 

Na 2019 a hasi un invershon di $12M i a renobá 223 kamber di hotèl, Nautilus restorant i nos casino. Na 2022 a añadí un restorant, e popular 5 O’clock Somewhere. Na 2023 a duna face-lift kompletu na Infinity Beach Club i a finalisá e renobashon di 14 suite. E aña aki, e planifikashon ta indiká un gym nobo, un ‘game arcade’ i un restorant nobo den Renaissance Mall.

 

Aktualmente e hotèl i casino tin un forsa laboral di mas ku 500 empleado di kual 97% ta lokal. “Nos ta masha orguyoso pa motibu ku un gran kantidat di nos empleadonan ta di promé ora, i ta huntu ku nos empresa pa 15 aña kaba! Ta ekstendé un gradisimentu na e promé propietarionan, MetaCorp, pa pone un fundeshi sólido i pa karga e responsabilidat di konstruí i operá e hotèl durante e promé 8 añanan. Desde 2017 i awendia, e propietarionan Wind Creek Hospitality a sa di sigui elevá nos produkto turístiko i den esaki tambe segurando futuro di tur nos empleadonan”. Wind Creek Hospitality ta un outoridat di Poarch Band Indians, e úniko tribu di indjan legalmente rekonosé na estado di Alabama, USA. Wind Creek Hospitality ta manehá un portafolio distinguí ku ta inkluí Wind Creek Atmore, Wind Creek Aruba, Wind Creek Bethlehem, Wind Creek Montgomery, Wind Creek Wetumpka, Wind Creek Curaçao, Wind Creek Chicago Southland (ku pronto lo wòrdu habrí), Wa She Shu Casino, Magic City Casino, WindCreekCasino.com, i diferente pista di kareda na Alabama i Florida. Wind Creek Hospitality den transkurso di añanan a bira hopi eksitoso den negoshi di casino, primordialmente pa motibu ku semper a duna bèk na su komunidatnan i a pèrkurá pa bienestar di tur su empleadonan.

 

Wind Creek Hospitality su mas resiente kolaborashon tabata Curaçao Baseball Week 2024 sinembargo den transkurso di añanan a hasi diferente donashon di pakete di kuminda, a ‘upgrade’ e fasilidatnan na Landhuis Pannekoek i a duna un sosten na diferente organisashon i fundashonnan.

 

E selebrashon di 15 aniversario Renaissance Wind Creek Curaçao Resort a bai kompañá ku, 15% di deskuento pa tur kliente den Nautilus, tambe un Masquerade Soiree pa tur partner den industria i un selebrashon pa henter e tim trahando na Renaissance Wind Creek Curaçao Resort. Riba fotonan athunto un impreshon di e selebrashon. Renaissance Wind Creek Curaçao Resort ta gradisí tur bishitante lokal pa nan lealtat i pa hasi tantu e hotèl i e casino un di esnan mas popular riba islanan ABC i Caribe!

コメント


bottom of page